17:11 “Yilning eng yaxshi chet tili o‘qituvchisi” tanlovi g‘oliblari Britaniyada malaka oshirib qaytdi | |
 O‘zbekistonlik 42 nafar “Yilning eng yaxshi chet tili o‘qituvchisi” ko‘rik-tanlovi g‘oliblari shu yilning 8—22 yanvar kunlari Buyuk Britaniyaning nufuzli oliy o‘quv yurtida malaka oshirib qaytdi. Bu haqda O‘zbekiston Respublikasi Xalq ta’limi vazirligi Axborot xizmati “Daryo”ga xabar berdi. Xalq ta’limi vazirligi va Buyuk Britaniyaning St. Mark & St. John universiteti o‘rtasida tuzilgan ikki tomonlama shartnoma asosida malaka oshirish uchun Buyuk Britaniyaning Devon grafligi, Plimut shahri yaqinida joylashgan nufuzli St. Mark & St. John universiteti tanlandi. Mashg‘ulotlar universitetning tajribali mutaxassislari va professorlari tomonidan olib borildi. Tajriba almashish davomida o‘zbekistonlik o‘qituvchilar dars o‘tishning turli usullarini, jumladan kichik guruhlarda ishlash, o‘qitishning kommunikatsion metodlaridan foydalanish, muammoli vaziyatlarda chet tilida muloqotga kirishish usullari iboralar va rolli o‘yinlar orqali o‘rgatildi. Shuningdek, tajriba almashish davomida o‘zbekistonlik ingliz tili o‘qituvchilari Plimut shahridagi til o‘rgatish markazlari va maktablarga safar uyushtirib, u yerda “O‘zbekistonning madaniyati va urf-odatlari”, “Ta’lim tizimi” kabi mavzularda taqdimot qildi. O‘quvlar yakunida barcha ishtirokchilarga sertifikatlar berildi. Mazkur 42 nafar malaka oshirib qaytgan o‘qituvchilar tayanch maktablar bazasida chet tili o‘qituvchilari uchun joriy yilning mart—dekabr oylarida o‘tkaziladigan o‘quvlarda trener sifatida ishtirok etadi hamda chet elda olgan bilim va ko‘nikmalarini hamkasblariga o‘rgatadi. | |
|
| |
| Всего комментариев: 0 | |