Россиялик Telegram фойдаланувчилари мессенжер асосчиси Павел Дуровдан хизматнинг Россияда ёпилишига йўл қўймаслигини, Россия коммуникация назорати идорасининг талабларига кўнишини сўраб Change.org сайтида петиция ташкил қилишди.

Петиция муаллифларининг фикрича, Россия коммуникация назорати идораси Павел Дуров жамоаси олдига ахборот тарқатувчи ташкилотлар тўғрисидаги маълумотларни тақдим этиш талабини қўйган. Бироқ, Telegram ҳозиргача ҳам бу талабни бажармаган. Бу ҳолат давом этадиган бўлса, федерал хизмати мессенжерни блоклаб қўйиши мумкин.

«Тўғри, бизнинг ҳақ-ҳуқуқларимизни ўйлаб ҳам, Россия коммуникация назорати идорасининг талабига жавоб бермаяпсиз. Аммо, биз — Telegram фойдаланувчилари ўз эркинлигимиз тарафдорларимиз ва Telegram тармоғидан фойдаланишни давом эттириш истагидамиз. Сиздан Telegram’ни тақиқланган тармоқлар рўйхатига киришига йўл қўймаслигингизни сўраймиз», — дейилади мурожаатда.

Эслатиб ўтамиз, Роскомнадзор ташкилоти ташаббуси билан Россия ҳудудида LINE, BlackBerry Messenger (BBM), Imo.im ҳамда Vchat каби мессенжерлар фаолияти тақиқлаб қўйилган.