Instagram суратлар ижтимоий тармоғига янги функциялар жорий этилди. Булар: юз учун виртуал ниқоблар, видеони тескари тартибда эълон қилиш учун «Перемотка», «Тарих»лар – «Истории» (Stories) учун стикер-ҳэштеглар ҳамда суратлар учун ластик функцияларидар.

Ҳозирча Instagram’да фақат саккизтагина ниқоб мавжуд. Булар – тилла ва муз тожлар, коала, «ақлли»лар кўзойнаги, қуён, капалак тожи, товус ва макияж ниқобларидир. Реал вақт режимида юзга ниқоб қўйган ҳолда суратга олиш фақатгина «Тарих»лар учун амал қилади.

Айтиш керакки, бу каби ниқоблар кўплаб бошқа иловаларда, масалан, ICQ’да ҳам мавжуд.

Шунингдек, Instagram’да видео намойишининг янги режими пайдо бўлди: энди уни «Перемотка» функцияси ёрдамида тескари тартибда эълон қилиш мумкин. Бундан ташқари, ўз «Тарих»ларини интерфаол ҳэштегли стикерлар билан тўлдириш имкони ҳам мавжуд. Бунда унинг устига босилганида, ўша ҳэштег бўйича қидирув функцияси ишга тушади. Суратлар учун эса «ластик» қўшилди.